Helgistund gegn hómófóbíu og transfóbíu 17. maí kl. 20:15

Home/Fréttir/Helgistund gegn hómófóbíu og transfóbíu 17. maí kl. 20:15

17. maí er alþjóðlegur baráttudagur gegn hómófóbíu og transfóbíu. Á þeim degi er þeirra minnst sem líða vegna andúðar fólks á kynhneigð þess, kynferði og kyngervi og óréttlætinu mótmælt. Að því tilefni verður haldin bænastund í Guðríðarkirkju í Grafarholti og hefst hún kl.20.15. Bænastundin er hluti af samstarfi kristinna LGBTT trúarhópa í Evrópu á þessum degi. Yfirskrift stundarinnar er „Ótti er ekki í elskunni“ (Fyrra Jóhannesrbréf 4:18). Allir eru velkomnir. Hinsegin kórinn syngur og einnig stígur á stokk söngvarinn Elis Veigar við undirleik Bjargar.

Hómófóbía og transfóbía er ekki bundin við trúfélög en það má þó segja að sýnileiki hennar sé oft á tíðum hvað fyrirferðamestur þar. Víða er kristin trú misnotuð í þeim tilgangi að verja aðgerðir gegn mannréttindum og mannlegri reisn og tilvist LGBTT fólks um allan heim og oft á tíðum til að verja andlegt og líkamlegt ofbeldi, útskúfun, einangrun og mannfyrirlitningu.

Við hvetjum öll þau sem hafna notkun boðskapar kristinnar trúar í þágu hverskyns ofbeldis, andúðar og aðgerða gegn mannréttindum fólks og öll þau sem vilja rjúfa þögnina um hómófóbíu og transfóbíu hvar sem er í samfélaginu, til að koma á bænastundina, njóta samfélags í trú, friði og kærleika, lofa lífið í öllum sínum fjölbreytileika og styrkjast í baráttunni gegn fordómum.

Það er Hinsegin í Kristi, samkirkjulegur trúarhópur LGBTT fólks sem stendur fyrir bænastundinni ásamt séra Sigríði Guðmarsdóttur sóknarpresti Guðríðarkirkju. Stofnaður hefur verið viðburður á FB, sem sjá má hér.

Hinsegin í Kristi
Homophbia

By | 2017-03-17T21:05:51+00:00 14. 05 2013 | 17:47|